Aktivitet og fellesskap

Me vil med dette orientera om at sjukeheimen har inngått eit samarbeid med Gunn Marit Bergstrøm i GMB Aktiv Helse AS. Saman med ho startar me aktivitetstilbod for bebuarane tysdagar mellom kl. 11.00 og kl. 13.00 i fyrste omgang fram til sommaren. Dette er eit prøveprosjekt gjennom prosjektet Leve heile livet. Aktiviteten er sjølvsagt frivillig. Gunn Marit vil saman med tilsette i starten gjennomføra ei kartlegging av kva behov den enkelte har for fellesskap og aktivitet. Nokre bebuarar treng mykje ro og kvile, og må kanskje skjermast mot for mykje aktivitet, medan andre har stor kapasitet og kan vere med på det meste. Vidare går me i gang med aktivitetstilbod på tysdagar for dei som kan og vil vera med. Samlingane vil gå føre seg i kvar sine avdelingar slik at bebuarane får vere i vante omgivnader. Etter kvart vil me invitera til ei pårørandesamling der me går gjennom kva me har gjort, formidlar erfaringar og fortel om aktivitetar ein kan gjera saman. Fysioterapeut Gunn Marit Bergstrøm brenn for forebyggande/helsefremmande arbeid og aktivitet som medisin. Ho har gjennom sitt arbeid erfart at rørsle set i gang både blodsirkulasjon og oksygentilførsel. Ved å puste djupare vert det frigjort hormon som dempar stressnivået i kroppen. Gjennom aktivitet får ein fram smil og latter noko som igjen aukar gledeshormona i kroppen. Me håpar at dette tiltaket vil skapa positive opplevingar for bebuarane og oss alle. De er velkomne til å vera med på aktivitetsøktene dersom de har lyst og tid!