Frivilligdagen 5. september 2026

Igjen inviterer me alle frivillige lag og organisasjonar til å visa fram aktivitetane sine i Voss sentrum fyrste laurdag i september 🤩 Saman set me fokus på kor viktig frivillig innsats og dugnad er for bygda, og me håpar Frivililgdagen vil inspirera og motivera fleire til å delta i aktivitet. Mål med dagen er å rekruttera fleire medlemar til lagslivet og visa fram mangfaldet av aktivitetar på Voss. Lag og organisasjonar som ynskjer å delta på Frivilligdagen får tildelt stand på 3x3 meter på Torget, i Bergsliparken eller i Vangsgata. Treng de meir plass gje beskjed om det i påmeldinga. Også i år vil det bli arrangert Generasjonsleikane, eit gratis lågterskelarrangement der me samlar ulike generasjonar til leik og moro. Frivilligdagen er eit samarbeid mellom Voss herad, Voss sentrum, frivillig lagsliv og Voss Frivilligsentral.